艾摩廉仍未試過帶領曼聯喺英超連勝。
曼聯喺英超又輸一場，周六(27日)作客1比3不敵賓福特後，領隊魯賓艾摩廉上任接近1年時間，仍未曾喺聯賽嘗過連勝滋味，場均1分成績亦屬「後費Sir年代」最衰，最慘係艾摩連喺場邊不斷做出垂頭、掩面、掩耳等動作，連串「無能為力」嘅表現再受非議，佢已被博彩公司列為下個被炒領隊大熱。
艾摩廉一直強調曼聯需要「連勝走勢」嚟累積信心，上場擊敗車路士後，今場有足足1星期時間備戰，可惜第9次爭取連勝失敗而回，艾摩廉領軍33場英超只有9勝7和17負，場均1.03分係費格遜退休後新低，比起蘭歷克(1.54分)、莫耶斯(1.68分)、坦哈格(1.72分)等「經典」都遠遠落後。
備受壓力嘅艾摩廉，喺場邊督師亦垂頭喪氣，當般奴費南迪斯喺76分鐘主射12碼，有機會追成2比2嗰陣，艾摩廉再一次垂頭望地「唔敢睇」，結果般費宴客收場。艾摩廉今場亦有掩耳、掩面等動作，有身體語言專家指佢承受巨大壓力下，出現「恐懼」、「缺乏信心」等表現，唔少球迷都指佢已無能為力。
隨住韋斯咸已將樸達炒魷，艾摩廉就成為英超下個被炒領隊大熱，博彩公司Bet Victor將艾摩廉被炒轉熱至1.62倍，呢位葡萄牙主帥賽後表示：「我從來唔會憂心自己份工，我唔係咁嘅人，做(炒魷)決定嘅人唔係我，只要我一日仲喺曼聯，我都會盡最大努力。」